O programa "E no verán?... Refréscate coa cultura" acollerá nove actuacións nos Patos e na Solaina
A Concellería de Cultura de Barbadás dará inicio hoxe, ás 21,00 horas, á súa programación de verán, no parque dos Patos da Valenzá, coa actuación da Banda de música xuvenil da Escola de Música Municipal de Barbadás.
O programa "E no verán?... Refréscate coa cultura", está formado por nove actuacións ao longo dos meses de xuño, xullo e agosto, e nel participarán múltiples artistas de disciplinas moi variadas.
NOVE XOVES, NOVE ACTUACIÓNS
Todos os xoves do mes de xullo haberá actuacións, sempre ás 21, 00 horas, e en dúas ubicacións distintas: parque dos Patos e parque da Solaina. Os xoves 5 e 19, haberá espectáculos na Solaina, e as outras dúas semanas nos Patos. Pasarán Culturactiva, Isla Letriska, Javi Javichi e Paco Nogueiras, por esta orde.
Xa no mes de agosto, haberá outros cinco espectáculos, un cada xoves, pechándose o día 30 co espectáculo de Isabel Risco e Fran Rei.