Manuel Brañas: “Que significa Ourense para nós? A metade de temas do disco fala da provincia"

Manuel Brañas lidera a formación Brañas Folk, que precisamente cumpre vinte anos de existencia e celébrao con novo disco: “Godaxe”. É un dos grupos de música tradicional galega máis consolidados no panorama. Son Manuel Brañas (gaita, arpa, zanfona, wistles, requinta, bombarda e chirimía); Leonardo Blanco (violín); Aser Álvarez (batería e pandeireta); Eduardo Balvís (baixo); José Antonio Blanco (guitarra); Ana do Souto (voz); Guillermo Brañas (Acordeón), e Olga Brañas (piano, teclados, pandeireta e pandeiro). Volve Brañas Folk con novo disco e hai unha referencia moi especial ás cantigas. Por que? No obradoiro de instrumentos da Deputación traballáramos xa na reconstrución de tódolos instrumentos esculpidos no Pórtico do Paraíso da Catedral. Fixéramos un concerto con eles hai anos, e outro con actuación de Carlos Núñez. Os instrumentos foron utilizados en varias actuacións pero non había nada gravado con eles. Así que esa era a miña idea, despois do traballo laborioso, que formen parte dun tema. Un tema coa cantiga 215 de Santa María. Por que esta? Creo que son 417 cantigas de Alfonso X e máis de 100 músicos cos seus instrumentos. Xa que foi o 800 aniversario do seu nacemento, decidimos facer coincidir isto cun tema gravado, que quedara aí e cos instrumentos do Pórtico. Ademais de pezas tradicionais, dediciron incorporar dúas pistas de folclore celta. Facemos música galega e sempre gravamos algún tema da música celta, porque é a música irmá. Os dous temas que incluímos no disco deste estilo estaban xa no primeiro disco de Arco da Vella, que foi un dos primeiros grupos de música folk que houbo en Ourense. As súas cancións falan dos magostos, de Curros Enríquez, dunha vendima… que significa Ourense para a súa música? De 12 temas que leva o disco, a metade son de Ourense, relacionados con Ourense ou coa provincia. O disco ábreo a “Xota de Moiade”, de Vilardevós, un tema que recuperaron Félix e Cástor Castro. Tamén está a “Trullada da Castiñeira”, que é moi popular porque o gravara a charanga do Cuco de Velle. O nome do disco, “Godaxe”, significa festa na xerga do barallete. Unha declaración de intencións despois destes tempos de pandemia? Si. Estamos desexando que se abran as festas e os concertos. Festa é do barallete, unha xerga de Nogueira de Ramuín que utilizaban os músicos, os canteiros e os afiadores.