O Concello de Ourense deixou sen axudas a 11 entidades sociais inicialmente
A concelleira do PP Noelia Pérez considerou onte “positivo” que o goberno local aprobase o xoves unha partida de 787.570 euros en axudas de emerxencia e convenios con entidades sociais, pero incidiu que “non é suficiente para atender todas as necesidades existentes na área social municipal”, polo que anunciou que o grupo popular seguirá demandando “novas partidas para atender estas demandas”.
Noelia Pérez lembrou que os populares xa apoiaron no pasado pleno partidas orzamentarias destinadas a axudas sociais “dentro da nosa política de oposición construtiva, porque non debemos esquecer que o benestar dos veciños debe ser a nosa principal preocupación, sobre todo aqueles que peor o están pasando neste momento de incremento desorbitado dos prezos”.
“Non estamos dispostos a que se repitan situacións como a sucedida este ano nos centros cívicos, onde as familias quedaron sen actividades de conciliación por falta de previsión desde o goberno local”, precisou.
