Acudiu a conselleira de Promoción do Emprego e Igualdade, Elena Rivo, con tres representantes de empresas que avogan pola responsabilidade social empresarial: Regalga, Arte&Comunicaciones e Cupa Group.
Rivo dixo que contar cun tecido empresarial responsable é “sinónimo” de maior produtividade. Segundo afirmou a conselleira, as empresas responsables destacan por ter “maior permanencia” dos empregados, “maior lealdade” do consumidor e mellor valoración da imaxe e da marca, entre outras cuestións.
Ademais, explicou os obxectivos do programa Responsabilízate, que avoga por que cada vez máis pemes aposten por este tipo de valores. “É importante que as nosas empresas sexan cada vez máis responsables para que todo o talento mozo que temos en Galicia siga apostando por Galicia”, declarou despois de subliñar a nova estratexia que desenvolve a Xunta en canto a responsabilidade social empresarial con ata 174 millóns de euros de orzamento.
