O PSOE de Barbadás presentou onte a súa candidatura para as eleccións municipais do 28 de maio, que estará encabezada polo actual alcalde, Xosé Carlos Valcárcel Doval. Nun acto celebrado no parque dos Carrís, os socialistas deron a coñecer a lista completa de candidatos que acompañarán ao actual rexedor, un equipo “moi renovado” que conta con ata cinco caras novas nos dez primeiros postos e que “quere traballar con ilusión, honestidade, transparencia, proximidade e con moitos proxectos de futuro”.
Os socialistas márcanse como principais obxectivos “mellorar as dotacións, recuperar o medio ambiente, pór en marcha novos roteiros culturais e turísticos, mellorar a seguridade pública e seguir avanzando na igualdade entre homes e mulleres”. Valcárcel subliñou que se trata dun proxecto no que “a ética, a transparencia, a honestidade e os valores do feminismo, do progresismo e da solidariedade son os piares centrais do traballo do goberno”.
O actual rexedor tamén aproveitou a presentación da súa candidatura para lembrar que nos últimos catro anos Barbadás “experimentou unha transformación total, converténdose nun referente provincial pola súa intensa actividade cultural, pensada para todos os públicos e con actividades totalmente gratuítas”. Salientou o “dinamismo económico” e volveu incidir no que tratará de converter nun dos seus proxectos estrela: “Situar na Valenzá un posto da Garda Civil, un tema de vital importancia e que permitirá mellorar a seguridade”.
