"Imos esperar a esas conclusións definitivas, pero esixiremos un prazo o máis aproximado posible (á data dada de 2018)", apuntou o vicepresidente da Xunta de Galicia, Alfonso Rueda
O Goberno galego non renunciará a que a conexión de alta velocidade de Galicia coa Meseta estea lista canto antes e "nos termos acordados inicialmente", aínda aceptando o "inevitable atraso" respecto á data comprometida de 2018 avanzado polo ministro de Fomento, Íñigo de la Serna, e que foi vinculado co "ano en funcións" do Executivo central.
"Seguiremos pedindo un prazo razoable para a súa conclusión e, ademais, nos termos acordados inicialmente", asegurou, en declaracións aos medios, o vicepresidente da Xunta, Alfonso Rueda, un día despois de que De la Serna puxese en dúbida a variante de Ourense, ao subliñar que atrasaría a chegada do AVE ata 2021 ou 2021 e invitase a reflexionar sobre o seu custo.
Preguntado acerca de se a Xunta comparte a visión do ministro e está disposta a renunciar a este tramo, Rueda replicou que o que fixo este luns o ministro é "dar efectividade" ao compromiso adquirido na súa reunión co presidente galego, Alberto Núñez Feijóo, de trasladar os argumentos e conclusións sobre a situación da conexión do AVE con Galicia.
Iso si, matizou que se trata dunha aproximación inicial, "un avance" a unha postura máis completa que podería concretarse en xaneiro. "O que fixo é un comentario nesa liña", subliñou, antes de apelar a "esperar" a que o Ministerio traslade ao Goberno galego as súas "conclusións definitivas" antes de "poder analizalas".
SEN ACEPTACIÓN "DIRECTA"
Dito isto, defendeu que, "dende logo" e aínda aceptando "o inevitable atraso" provocado por un ano "en funcións" do Goberno central, a Xunta "seguirá pedindo un prazo razoable" para a conclusión do AVE "e, ademais, nos termos acordados inicialmente".
"Imos esperar a esas conclusións definitivas, pero esixiremos un prazo o máis aproximado posible (á data dada de 2018). Esperaremos a ver as razóns que aduce Fomento, as conclusións dende o punto de vista presupostario e de prazos, pero iso non quere dicir que se acepte directamente o que onte apuntaba o ministro", garantiu.
