O xornalista do diario La Voz de Galicia gañou o galardón polo traballo "Por que os xornalistas escriben tantas parvadas que non interesan a ninguén?"
O xornalista do diario La Voz de Galicia Manuel Rodríguez García gañou o LXXIV Premio Xornalístico "Pérez Lugín", convocado pola Asociación da Prensa coruñesa (APC), polo traballo "Por que os xornalistas escriben tantas parvadas que non interesan a ninguén?".
O galardón, dedicado este ano aos "110 anos de historia e xornalismo", coincidindo co aniversario da APC, está dotado con 3.000 euros e convócase anualmente, co patrocinio da Xunta de Galicia e do Concello da Coruña.
O traballo, presentado baixo o lema de "A veterinaria das abellas", competiu con 14 máis e logrou facerse co galardón por unha ampla vantaxe de 10 puntos -obtivo 25- sobre o seguinte, informa a APC nun comunicado.
O galardoado co premio xornalístico máis antigo de España recibirá esta distinción o vindeiro 22 de xaneiro durante un acto solemne que terá lugar no salón de plenos do Consistorio coruñés.
A decisión do xurado fíxose pública esta tarde despois da reunión do xurado do que formaron parte a Xunta Directiva da APC; o gañador do pasado ano, Gabriel García Enríquez; os decanos das facultades de Ciencias da Comunicación da USC e da UDC, Xosé Ramón Pousa e Juan Videla, respectivamente.
Así mesmo, integran o xurado César Casal, subdirector de La Voz de Galicia; Juan Carlos Rodríguez, redactor xefe do Gabinete de Comunicación da Secretaría Xeral de Medios da Xunta de Galicia; e a responsable de Comunicación do Concello da Coruña, Sonia Pose.
Rodríguez García formou parte da primeira promoción da Facultade de Xornalismo da USC e traballou na sección de Sociedade e Cultura de La Voz de Galicia desde 1995 e ata 2006, ano en que se incorporou á delegación deste diario na Coruña.
