Este recoñecemento é pola súa longa traxectoria profesional de máis de dúas décadas a prol do audiovisual galego
O produtor, director e guionista Ángel de la Cruz recibirá o próximo 4 de agosto o galardón Xociviga de Honra, dentro da programación das Xornadas de Cine e Vídeo de Galicia, que se celebrarán no Carballiño do 30 de xullo ao 4 de agosto. Este recoñecemento é pola súa longa traxectoria profesional de máis de dúas décadas a prol do audiovisual galego, tanto como membro activo de numerosos colectivos profesionais, como produtor, director e guionista, especialmente no campo da animación, pola que recibiu numerosos galardóns, entre eles tres Premios Goya. Ademais, o xornalista e historiador da fotografía Xosé Manuel Rodríguez recibirá o 31 de xullo a Insignia de Ouro Xociviga, polo seu labor nas xornadas entre os anos oitenta e noventa.
