“A ti, que non es capaz de dicilo. / A ti, que nunca escoitaches un silencio tan forte cando tantas palabras necesitabas. / A ti, que es unha flor sepultada baixo a neve, / en espera dunha primavera que só ti podes facer chegar. / A min, aínda que agora non o sinto, algún día o poderei dicir. / quérote, / quérome.” Con estes versos, a ourensá Carmen Fernández Margusino resultou gañadora do certame “Lingua de namorar”, convocado pola Dirección Xeral de Xuventude co obxectivo de dinamizar o uso do galego entre os máis novos e demostrarlles que pode ser a lingua vehicular das súas relacións amorosas.
Carmen, estudante de Maristas, optou por escribirlle un poema á “Carmen do futuro” como unha oda á importancia do amor propio. “Á flor baixo a neve”, que así se titula, tiña unha misión: aprender a aceptarse e quererse. E ademais, de conseguilo, tamén chamou a atención dos organizadores do certame.