A medida que a normalidade se vai instalando de novo nas nosas vidas, van voltando as tradicións que a pandemia obrigou a paralizar. Volveron os Magostos, o Nadal, o Entroido e agora, tal e como manda o calendario, era o turno dos Maios.
A festa, unha das máis agardadas polos ourensáns, xuntou na Rúa do Paseo a milleiros de persoas para cantar as coplas dándolle a benvida ó bo tempo e encheu de musgo, carrabouxos e xestas a decoración urbana. Pero antes, tocaba preparar os maios.
Por iso, dende a Concellería de Educación organizaron varias sesións de elaboración destas estructuras tradicionais no entorno de San Francisco, convidando a diferentes colexios da cidade a participar da tradición. Os centros José García de Mende e Cardenal Cisneros foron dous dos que se achegaron a afondar no método de elaboración dos maios e de composición das coplas.
A primeira fase foi a de elixir os materiais. Carrabouxos, xestas, musgo… A combinación quedou á elección dos mozos e mozas, que, dirixidos polos monitores, compuxeron a clásica pirámide que lle dá forma á festa dos Maios. Por grupos, tamén compuxeron as súas coplas.