Bombeiros, membros de Protección Civil, axentes da Policía Local ou da Garda Civil encheron a Praza Maior de Ourense con todo o material, vehículos e ferramentas que empregan para resolver as emerxencias que se poidan dar, especialmente, se empeza a arder nalgún punto. Durante dous días, milleiros de escolares da cidade achegáronse a ver de preto este despregue de medios na primeira edición da Semana da prevención de incendios.
O obxectivo da iniciativa era o de achegar á cidadanía os servizos de emerxencia para concienciar sobre a necesidade de adoptar unha conducta preventiva como cidadáns e aprender a comportarse ante calquera posible situación de emerxencia en xeral, e moi especialmente nos incendios no ámbito urbano.
A moto acuática foi o vehículo favorito dos máis novos, que non dubidaron en subir e simular que surcaban as augas do río Miño. Tamén lles chamou moito a atención o coche da Policía Local, no que entraron por parellas e puideron comprobar tódolos elementos que o distinguen dun vehículo tradicional. A “Casa do fume” -un simulador que recrea unha vivenda e varias habitacións para aprender a escapar dun incendio- ou o obradoiro que aportaron os Técnicos en Emerxencias Sanitarias da Asociación Tesgalicia sobre primeiros auxilios tamén foron un éxito entre os escolares participantes, que se converteron en expertos na prevención de incendios.
