O conxunto monumental de San Francisco desenvolve este curso un programa de visitas para escolares que lles permite ós alumnos de toda a provincia coñecer este emblema do patrimonio ourensán ó tempo que descobren o funcionamento do Arquivo Histórico Provincial, que ten a súa sede neste renovado edificio.
Un dos centros educativos que pasaron nos últimos días por el foi o Carlos Casares de Xinzo de Limia. O alumnado de quinto de Primaria tivo ocasión de achegarse ata o conxunto arquitectónico para visitar as exposicións permanentes “Documentos históricos de Ourense” e “San Francisco: arquitectura e historia”, da man dun monxe franciscano moi especial que os guiou polas instalacións e pola historia documental da provincia.
Separados en dous grupos para facer máis amena a actividade, os alumnos de Xinzo tamén tiveron ocasión de coñecer como escribían na antigüidade a través do obradoiro de escritura medieval, no que fixeron un pergamino da súa linaxe familiar.
As visitas a San Francisco están organizadas dende o Arquivo Histórico e o seu director, Pablo Sánchez Ferro, amósase moi contento co éxito que están xerando entre a comunidade educativa.