Grazas ao grupo de goberno do Concello de Ourense, se alguén de vostedes está esperando ao día de San Benito, na procura de curar algunha doenza, non se faga esperar e evite o desprazamento á cova do Santo. A oportunidade tena na Praza Maior de Ourense máis fácil non llo poden pór-, xa que aí encontrará todo tipo de plantas medicinais: desde sementes para tratar o estreñimento, hainas tamén para a depresión; se padece sinusites, ou dor de reuma, ata migrañas e varices, pode dar na Praza Maior cos remedios; se non dorme ben ou non é capaz de deixar de fumar polo estrés, se vai vostede ata Praza Maior non só poderá apreciar a fachada do Concello de Ourense senón que, dunha tacada, pode quedar libre de estrés e aforrar o que gasta en tabaco. Amén de outras doenzas, porque plantas medicinais a granel hainas de abondo. Se non fora porque chove sobre mollado, e porque coa saúde non se xoga, o tomaríamos a broma. Pero as nosas responsables autoridades municipais semellan non enterarse que a lei é dura, pero é a lei (Dura lex, sed lex); e, se o saben, e non a fan cumprir, pois que queren que lles diga dos nosos responsables municipais: que fan o que poden, e non fan cumprir o que saben. Parece que, estando advertidas, xa en máis dunha ocasión, de que a venta de estes produtos medicinais é ilegal, non só se está a faltar ao respecto á oposición case sería o de menos-, pero tamén se incumpre a lei. A pasan polo forro da legalidade. E xa non digamos como queda en entredito a palabra do alcalde se, como consta, comprometérase á impedilo nesta edición.
Os cidadáns de Ourense, da mesma maneira que acoden para tocar con toda reverencia e esperanzados a San Benito, poden probar as herbas medicinais da Feira gastronómica do Maio na Praza Maior, aforrando de seguro a viaxe ata o Santo. Na Feira da Praza Maior o mercadeo farmacéutico é un feito un ano máis; poderán comprobar que existen misterios que non son necesariamente milagres, con acudir se é que para daquela non pechou a Feira-, a Praza Maior o ano que vén; porque se non hai dúas sen tres, pode que non haxa tres sen catro. Ninguén ofrece tanto como o que non vai a cumprir; polo que de seguro que no ano que vén tamén haberá sementes medicinais. Acudiremos e, de paso, deixamos un pouco tranquilo a San Benito, para non distraelo de outros avatares de máis enxunlla, que necesitarán de toda a atención do Santo. Que a política non sexa a arte de mentir a propósito, que coa saúde non se xoga.
