A oitava edición do Encontro de Cacharreiros devolverá a tradición da olería ao municipio de Niñodaguia (Xunqueira de Espadanedo), concretamente, ao Museo Obradoiro de Olería; esta fin de semana -do venres 12 de agosto, ao domingo 14-. O evento, de carácter gratuito, estará organizado pola Asociación Amigos do Barro de Niñodaguia, a Deputación de Ourense e a Xunta de Galicia. Entre outras actividades, o sábado pola noite actuarán no museo as Cantareiras de Niñodaguia (21,30 horas) e Emilio Rúa (22,00 horas).
Este mércores tivo lugar a presentación das xornadas no Pazo Provincial. Nela interviu o vicepresidente segundo da Deputación, César Fernández, o alcalde de Xunqueira de Espadanedo, Carlos Gómez, e os organizadores Mónica Blanco, guía cultural do museo de Niñodaguia e Agustín Vázquez, presidente da Asociación Amigos do Barro de Niñodaguia.
César Fernández destacou o deseño dun evento que “une a un oficio tradicional da nosa cultura con obradoiros, exposicións e a música”. Pola súa banda, o alcalde de Espadanedo, Carlos Gómez, resaltou a traxectoria dunha xuntanza que “naceu como unha aventura” e destacou a “enorme axuda da Deputación e a Xunta, con apoios como o da presidenta de Artesanía de Galicia, Elena Fabeiro”.
No encontro participarán sete cacharreiros de toda Galicia.
