Centos de persoas participaron onte no parque de Portovello, en Allariz, nas celebracións do Día da Patria organizadas dende o Concello de Allariz
Centos de persoas participaron onte no parque de Portovello, en Allariz, nas celebracións do Día da Patria organizadas dende o Concello de Allariz. Por segundo ano consecutivo, as marxes do Arnoia foron o escenario dun encontro interxeracional onde non faltou nin a gastronomía, nin a música tradicional galega. "O traslado a propia vila, aínda que perdeu o atractivo do souto de Folgoso, gañou en participación e tamén en comodidade para todos aqueles que non querían coller o coche", recoñecía o alcalde, Francisco García, que destacaba o ambiente festivo que se viviu dende media tarde cos preparativos das mesas e a ambientación dos gaiteiros.
"Celebramos este ano o día da Patria Galega reafirmando o noso compromiso de loita por unha Galiza dona do seu futuro, unha Galiza con dereito a existir como pobo diferenciado do mundo", arrincaba o manifesto que a partir da medianoite daba a benvida ao 25 de xullo. Unha lectura que foi sucedida pola actuación da orquestra Os Modernos, que prolongou a festa ata ben entrada a madrugada.