Unha nova edición da Festa do Boi comezará este fin de semana en Allariz e, para quentar motores, a Asociación Xan de Arzúa, en colaboración coa Concellería de Cultura -e a cooperación do colexio Padre Feijóo-, ten organizadas varias actividades esta semana dirixidas aos máis cativos.
A primeira delas tivo lugar hoxe luns e consistiu nun roteiro teatralizado sobre a Festa do Boi que discorreu por varios espazos do casco antigo da vila e no que participou alumnado de Primaria do colexio Padre Feijóo. A Asociación Silvardeiras da vila alaricana colaborou tamén con esta iniciativa, que se repetirá o xoves.
Por outro lado, para mañá martes está programado un obradoiro e charla da man de Juan Antonio Seara. Nesta iniciativa falarase sobre o libro “O corpus cristi en Allariz”, que foi publicado este ano e escrito por Juan.
O venres será a quenda dos rapaces de sexto de Primaria. Os menores participarán dun obradoiro no que se abordará a figura dos homes do sedeño e da aguillada e realizarán, do mesmo xeito, unha casaca para ser homes e mulleres do sedeño durante as Saídas do Boi Infantil, coidando do mesmo.
Dende a Asociación Cultural Xan de Arzúa de Allariz recordan que levan “máis de 35 anos traballando por conservar a memoria histórica da Festa do Boi”: a orixe medieval da mesma, de como vivían e se relacionaban as persoas naquela época e como xurdiu a festa máis popular da vila alaricana.
Durante os nove días que durará a celebración -do 11 ao 19 deste mes de xuño- varias actividades terán como protagonistas a eses gremios que tan importantes eran no 1317, e tan importantes son no 2022.