Hai moitos anos topei en Bos Aires un matrimonio de emigrantes que levaba alí máis de corenta anos. El falaba un perfecto castelán arxentino froito do contacto co medio a través da empresa; ela saía menos da casa. E falaba castelán con infinitivo conxugado. “Al llegarmos a la Argentina tuvimos que trabajar mucho”... “El iren nuestros hijos a la Universidad, fue para nosotros un gran motivo de orgullo”...
Si. O infinitivo conxugado é unha das almas da lingua. De non o usarmos, estamos falando galego light, descafeinado, zero zero; estamos falando mal. É moito peor para a saúde da lingua non empregarmos infinitivos conxugados que usar castelanismos léxicos. Ao utilizares o infinitivo conxugado, simplemente demostras que falas ben. E hai que pórse a elo.
