A Xunta e outras comunidades autónomas acordaron instar o Goberno central a prohibir a facturación eléctrica por estimación tras a 'problemática' xerada aos consumidores coa regulación do mercado enerxético levada a cabo polo Goberno central. A Consellería de Industria lidera as propostas para a implantación dunha factura enerxética 'unificada e sinxela' no ámbito nacional para tratar de garantir 'a transparencia e a protección' dos consumidores.
Con este obxectivo, o titular de Industria presidiu a reunión convocada polo departamento autonómico con responsables na materia das comunidades autónomas para 'analizar a problemática xurdida' tras a regulación do mercado enerxético do Executivo central, na súa opinión, 'en prexuízo dos consumidores'.
