Jesús Vázquez pide o voto para "pechar as portas á seca no termalismo e no ámbito social e de infraestruturas"
O presidente do PPdeG, Alberto Núñez Feijóo, reivindicou en Ourense "máis que en ningún lugar" a necesidade de estabilidade para "non seguir sendo unha lea constante" e alegou que "ninguén" poderá recordar "tantas discrepancias, sumarios, tantos imputados e dimisións en tan curto espazo de tempo", en alusión aos últimos catro anos, coa dimisión do anterior alcalde socialista Francisco Rodríguez, imputado na 'Operación Pokémon'.
Nunha comida-mitin celebrada nas instalacións do colectivo de atención a minusválidos Aixiña, o presidente arrancou a súa intervención con referencias á España que deixou José Luis Rodríguez Zapatero, "ao bordo do rescate", e á Galicia de hai oito anos, tras o goberno bipartito, e de fai catro cando o "pobo soberano" deu ao PP a "segunda oportunidade" cunha maioría ampliada.
Logo referiuse a Ourense e durante menos de media hora, recordou aos 200 asistentes que "ningunha lexislatura na historia de Ourense tivo tantas leas como a destes últimos catro anos, nunca antes se viviu unha experiencia tan impropia da política".
"Divisións nos dous partidos do goberno, logo divisións no partido de goberno do alcalde, e mesmo o alcalde discrepou consigo mesmo e pola mañá era unha cousa e pola tarde outra", relatou, para subliñar que fronte a iso, co PP, a cidade terá no PP "experiencia, renovación e unidade".
PP ÚNICO FRONTE A DIVISIÓN
Feijóo destacou tamén a unidade do PP, co seu equipo e programa "único" para ofrecer a Ourense estabilidade e avance nos próximos anos, fronte a unha alternativa "doutros que son os mesmos, pero máis divididos". Cun panorama como o da división do último goberno local, e división nas alternativas "é imposible avanzar, pois con gobernos inestables só se avanza cara á descomposición".
Así que ofreceu "traballar xuntos" porque as eleccións serán decisivas "pero en Ourense máis para que non "siga a lea constante". "Os ourensanos decidiremos que os que discutían, o sigan facendo na oposición", rematou.
SECA EN TERMALISMO
A chegada de Feijóo produciuse cando os comensais acabaron coa empanada e embutidos, cunha hora de atraso sobre a prevista e mentres os asistentes degustaban un estufado de carne con patacas, comezou o mitin coa intervención do candidato do PP á Alcaldía de Ourense, Jesús Vázquez.
Na súa breve intervención, referiuse á necesidade "doutra mirada" para Ourense, aludindo así ao lema do turismo provincial feito promoción pola Deputación da provincia, a través do Instituto Ourensano de Desarrollo.
Vázquez animou, co voto ao PP, a "pechar as portas a oito anos de seca en termalismo, infraestruturas e seca nel ámbito social" e aos "espectáculos ofrecidos na casa do concello".
Referiuse ao lugar da comida-mitin para explicar que o PP "non defraudará" a todos os colectivos do ámbito sociosanitario, como Aixiña, e anunciou para eles que cada ano haberá unha "pequena" partida para ir eliminando barreiras "non só físicas", como a mellora da empregabilidade.
"Priorizar a xente, é necesario", subliñou, para engadir que Ourense necesita "xestión e ilusión". "Queremos e podemos", agregou, e recordou que queda unha semana para as eleccións e que o PP, pola súa banda, "comezou a limpeza hai tres meses, cando decidiu comezar cun programa para todos".
O presidente do PP provincial, José Manuel Baltar, tamén foi moi breve e comezou cunha referencia numérica habitual en todas as súas intervencións, para recordar que este é un día clave, pois é o 14 de maio "como 14 serán os concelleiros que se consigan para a cidade, polo menos".
"O CANDIDATO QUE ESTÁ EN TÓDALAS PARTES"
Anunciou que o PP gobernará a cidade "para todos, sen excluír nin discriminar" e referiuse á campaña do PSOE como a do "candidato que vai só" e a do PP como a do candidato "que está en tódalas partes", cunha campaña "modélica" polo que rematou cun "viva o PP, viva Ourense e viva o alcalde!".
A intervención de Feijóo foi a última e durou media hora, durante a sobremesa a base de torta de caramelo, e logo permaneceu media hora máis, durante o café, na mesa ocupada polos compañeiros de mitin, o parlamentario Miguel Santalices, o coordinador de campaña e candidato a edil, Jorge Pumar, entre outros.
