O maior Entroido itinerante da provincia de Ourense volveu onte a mostrar as súas mellores galas. Ata 39 carrozas confeccionadas polos veciños das distintas parroquias do municipio participaron no Entroido de Parada de Amoeiro. Fixeron, como é habitual, un percorrido polas diferentes aldeas, onde os veciños lles ían ofrecendo pinchos e bebida ao seu paso. Estiveron acompañados en todo momento pola charanga Os Chafalleiros, que foron amenizando a velada ao seu paso por A Bergueira, Trasalba, Fontefría, Bóveda, As Quintás e Amoeiro. A rolda polas aldeas comezou ás nove e media da mañá e rematou pasadas as seis da tarde. Xa á tardiña, veciños e participantes das carrozas tiveron festa a cargo da orquestra Capitol no campo da festa de Parada. O entroido itinerante non rematou. Quedan aínda dúas etapas. Hoxe haberá percorrido de novo polas aldeas de Amoeiro, Cea e Maside, e á noite verbena con catro vocalistas da orquestra Panorama e dj. Mañá haberá xantar popular e pola tarde percorrido polas aldeas da parroquia de Parada e, para rematar a festa, actuación do grupo Xoldra.
A diversión foi predominante en toda a xornada, na que o tempo respectou bastante o percorrido. O Entroido de Parada, no que moitos dos participantes levan meses traballando para facer as carrozas, é xa unha tradición consolidada.
