Baixo unha carpa acondicionada para soportar as baixas temperaturas, as familias desfrutaron dunha tarde inolvidable de troula, na que os rapaces foron os protagonistas.
Así, a Fundación Insua dos Poetas, que preside o escritor Luis González Tosar, desenvolveu un completo programa con xogos, paseos a cabalo, regalos, un concurso de disfraces, maxia e unha merenda de balde con produtos típicos desta festa.
Non faltou a música e entre os asistentes contouse coa comparsa do Irixo, “Unha leira de millo”, gañadora do concurso do martes de Entroido no Carballiño. O Mago Deimi encargouse de conducir a xornada e na competición de disfaces os premios, como é habitual na Insua dos Poetas, foron lotes de libros e xogos didácticos nas tres categorías establecidas, de 0 a 6 anos, de 7 a 10 e de 11 en diante.
Foi unha festa na que destacou “a creatividade da cultura popular acompañada da música e, como non, da gastronomía entroideira”, segundo apuntaba Tosar.
