Afonso V. Monxardín: "La Región logrou que a xeración Nós tivera voz trala Guerra Civil"

O catedrático en Lingua e Literatura Galega Afonso V. Monxardín será o protagonista do Foro La Región que se celebra hoxe ás 20,15 no Centro Cultural Marcos Valcárcel. A conferencia, que leva por título “Nós e Ourense, con La Región ao fondo”, tamén será retransmitida en directo por streaming a través da páxina web deste xornal, www.laregion.es. Cal foi a importancia da prensa para o desenvolvemento da xeración Nós? Por aquel entón, non existía a radio. Polo tanto, os xornais eran claves para o movemento galeguista. Nos anos 20 aínda había outros medios cos que os membros da xeración colaboraban máis que con La Región, como A Nosa Terra, ou, no que respecta a Ourense, o diario La Zarpa. É a partir de finais dos anos 30, trala entrada da familia Outeiriño, sobre todo baixo a dirección de Ricardo Outeiriño, cando muda esta situación. O seu traballo con La Región mantívose no tempo? Desde entón, colaboraron de forma permanente, tanto en La Región coma noutros dos proxectos editoriais aparellados como Misión, unha revista cristiá da parroquia e a escola. Para Otero Pedrayo, a súa colaboración con La Región de 1938 a 1948 foi clave como sustento vital. Escribía baixo varios pseudónimos, mentres que os artigos de Vicente Risco sempre aparecían co seu nome. Durante os anos 30 e 40, a actividade deles dous e de López Cuevillas é impresionante. Poden consultarse mostras deste traballo a día de hoxe? Temos recompilatorios, coma o marabilloso “Cousas de Ourense”, que é unha escolma dos artigos de Cuevillas para La Región. De Vicente Risco, temos “Libro de las horas”. Este era o título dunha sección que manteu no xornal. E poderíanse facer dez ou vinte recompilacións por cada un destes tres autores. Otero Pedrayo escribía ás veces nas páxinas do xornal dun mesmo día baixo tres ou catro pseudónimos distintos. Foi unha colaboración intensísima, até a nivel gráfico: aportando Corbal os debuxos e Risco os pés de foto, publican o libro “Ourense perdurable”. As páxinas de La Región permitiron que seguiran tendo voz e presenza constante trala guerra . A visibilidade da xeración e do galeguismo ten neste medio ourensán o seu punto central de continuidade. Pedrayo colaborou con outros xornais, como El Correo Gallego, pero dunha forma menor. Coido que sería conveniente facer uha recompilación exhaustiva do publicado en La Región polos tres autores, e poñelo á disposición do público. Porque un, a medida que bucea nesta obra, atopa marabillas. A hemeroteca de La Región, que agardamos que esté dixitalizada canto antes, é un pozo sen fondo. Logrouse unha simbiose perfecta entre estes personaxes e o xornal local. Cal foi o motivo de que Otero Pedrayo escribise baixo diferentes pseudónimos? Coido que as causas son múltiples. Unha delas, non ser tan visible durante a posguerra, tendo certa precaución e á vez liberdade para colaborar en diferentes artigos e seccións.