O mandatario provincial realizou este anuncio ao ser preguntado polos medios de comunicación no transcurso dun acto no Museo de Pontevedra.
O presidente da Deputación de Pontevedra, o popular Rafael Louzán, confirmou este martes a súa intención de presentar a súa candidatura á Federación Galega de Fútbol, unha vez que se abriu o prazo. "Era o momento", segundo dixo, de anuncialo formalmente.
O mandatario provincial realizou este anuncio ao ser preguntado polos medios de comunicación no transcurso dun acto no Museo de Pontevedra.
Louzán manterá este martes unha reunión cos clubs da delegación territorial de Pontevedra para explicalos "por que" van "estar aí, intentando defender os intereses do fútbol galego", cunha especial dedicación, segundo abundou, cara ao fútbol base, feminino e o fútbol sala que, a partir de xaneiro, se integra dentro desta federación.
Este encontro repetirase este mércores cos asembleístas que representan os clubs da delegación territorial de Vigo e, sucesivamente ata o 18 de decembro, día no que se votará ao novo presidente. Louzán manterá encontros con todos os representantes de clubs, adestradores, xogadores e árbitros do resto da comunidade galega.
"Ampla petición"
Segundo comentou, o presidente da Deputación de Pontevedra tomou esta decisión ante a "ampla petición" que lle fixeron os clubs da provincia que buscaban, segundo comentou, unha persoa "que tivese coñecemento da xestión dunha administración".
Ao respecto, afirmou que aceptou este desafío coa idea de renovar a federación e mellorar o traballo feito e recordou que se trata do deporte cun maior número de licenzas federativas en Galicia, máis de 60.000, que a sitúan como a cuarta máis numerosa de toda España.
Instalacións "dignas"
Sen querer desvelar máis detalles sobre o seu programa, Rafael Louzán avanzou que un dos eixes da súa xestión será intentar dotar toda a comunidade dunhas instalacións "dignas" para a práctica deste deporte.
Xunto a Rafael Louzán, optará ao cargo o actual presidente, José García Liñares, despois de que o outro aspirante, Juan Vázquez, anuncie nas últimas horas a retirada da súa candidatura.
