Ernesto "Tito" Rodríguez: "O futuro da comarca de Monterrei pasa pola viticultura e polo enoturismo"

Ernesto Rodríguez, máis coñecido como Tito, e Asunción Rodríguez (a súa irmá) son os propietarios da bodega Crego e Monaguillo. A finais de xuño presentaron a súa nova marca, Reitoral de Monaguillo, en Vilamaior, lugar que “nace dunha ilusión”. Verín inaugura la temporada de verbenas con la París de Noia y la Panorama Que é a Reitoral de Vilamaior? É un espazo que coñecía de fai moito tempo. Despois de botar moitos anos tratando de mercarlle a Reitoral ó Obispado, haberá seis ou sete anos que o logramos. O primeiro que fixemos foi preparar o terreo para plantar viñedos, inicialmente tiña tres hectáreas e agora andamos sobre 10 hectáreas. Despois, no que é a reitoral, a idea inicial era facer unha casa rural, pero finalmente fixen unha casa na que teño pensado vivir, cunha zona apartada para a vida social. E Reitoral de Monaguillo? Como todas as ideas nace dunha ilusión. Xa que collemos a reitoral e plantamos viñedos, decidimos facer unha nova marca, Reitoral de Monaguillo. O nome ven da propia reitoral e de min, porque eu era o Monaguillo de Ernesto, co que comezamos este soño. Esta marca é propiedade de Father 1943, que xunto con Viticultura Monterrei son sociedades vinculadas a matriz de todo, Crego e Monaguillo. Quen é o Father? Father era Ernesto Atanes (xa falecido), o crego co que comezou a andadura de Crego e Monaguillo no 2002, no 2005 fixemos a primeira gran ampliación e despois fixemos cinco máis. Eu todo o que son débollo a el. O seu pai e o meu eran moi amigos. El a min viume nacer, as familias tivemos unha relación moi estreita sempre. Por que festexaron a creación desta marca? Parte do que somos debémosllo ós viticultores e entendiamos que había que agradecerlles o seu traballo. Houbo que limitar o número de invitados, polo que reducimos a cita aos nosos viticultores, distribuidores e amigos persoais, eramos sobre mil persoas. Ademais trouxeron ás orquestras Panorama e París de Noia… Si. O das orquestras comezou falando coa xente de aquí, entón seguimos para adiante. Cheguei a un pobo novo, onde me acolleron cos brazos abertos, foi unha forma de agradecemento. Ademais, hai moitos lugares onde poñer viñedos, pero ademais de que esta zona é espectacular, non en todos os sitios te reciben igual, e aquí foi extraordinario. Cantas hectáreas de viñedo ten? Na actualidade, Crego e Monaguillo xestiona unhas 100 hectáreas, entre propias e alugadas, en toda a Denominación de Orixe. E cara onde camiñará? Eu teño claro que nos próximos anos, o futuro da comarca de Monterrei pasa polo campo, e especialmente polo viñedo. Hai outra fonte por explotar, o enoturismo. Pero para iso hai que crer. Xunto coas augas, hai un potencial brutal, pero ten que haber aposta ben combinada público e privada. A festa que fixen eu foi unha forma de facer enoturismo, é unha promoción. Iso é aportar, na miña opinión. Cando traes a alguén a túa casa e os tratas ben dá resultados, e cando digo a miña casa, pode estenderse a toda a comarca. Unha lección deste tempo? Na vida debes ser fiel e humilde.