Ao comezo da 60 edición da Festa do Pulpo do Carballiño, que este ano estrease co distintivo de evento de Interese Turístico Internacional, a organización recoñecerá “o esforzo” feito ao longo de todos estes anos polas pulpeiras da vila, así como a contribución á festa do historiador Felipe Senén.
A todos eles, pezas imprescindibles para perpetuar a tradición desta festa, se lles renderá homenaxe mañá, ás 12,00 horas, na Casa do Concello.
Dende a organización prevén que “unha nutrida representación destas profesionais” recollan un obsequio, ao mesmo tempo que o propio Felipe Senén, do que destacan tamén o seu labor como arqueólogo, museólogo, presidente da Asociación de Amigos dos Museos de Galicia e actual secretario da Academia Galega de Bellas Artes.
SEMANA GRANDE
A homenaxe ás pulpeiras e ao historiador será o primeiro acto da semana grande da Festa do Pulpo, aínda que a súa programación especial xa comezou o pasado día 1 de agosto coa semana grande para os pequenos. A proposta incluíu o Festival de Habaneras ou o que leva por nome “Feito no Carballiño”, proxecto que promociona a aqueles grupos que contan co talento dun carballinés ou carballinesa.
O martes vivirase un dos momentos máis especiais da festa: o de intentar bater un novo récord coa preparación da tapa mais grande do mundo. Nesta ocasión serán 515 os quilos de pulpo -15 máis que o ano pasado- os que se cocerán, e na súa preparación participarán unha trintena de profesionais.
O Concurso de Camisetas do sábado será outro dos pratos fortes da programación. Dende a organización subliñan que xa son unha vintena as peñas inscritas para participar, se ben o prazo para entregar a documentación remata este mércores. Neste senso, a participación está aberta a todos os colectivos, sen límite de idade, sempre que o responsable da agrupación teña máis de 18 anos.