Unha ruta cultural o próximo 21 de setembro desde a Ponte de Veiga ata a sede do Centro de Estudios Chamoso Lamas, en Cabanelas, porá o colofón aos actos programados por esta entidade para conmemorar o 25 aniversario da súa creación. Trátase dun percorrido de 10 quilómetros por algúns dos lugares de maior interese histórico e paisaxístico do municipio carballiñés e de Boborás, e que inclúe unha parada en Moldes ao mediodía para xantar, así como a proxección dun video sobre os 25 anos de traxectoria do centro de estudios, que se fará na sede da entidade en Cabanelas.
Algúns destes lugares do percorrido son: Ponte de Veiga, Gran Balneario, Museo Etnográfico, Torre de Godás, Ponterriza, Moldes, Castro Cavadoso, Cima de Vila e Cabanelas, seguindo o curso do río Arenteiro. A andaina estará guiada polos arqueólogos, historiadores e biólogos do centro de estudios que irán dando explicacións de cada un dos monumentos e lugares de maior interese.
A saída da ruta está prevista para as 9,30 horas, e o regreso ás 18,00 horas. Para poder participar nesta andaina, que ten as prazas limitadas a 50, hai que inscribirse previamente na dirección de correo electrónico do centro de estudios [email protected], ou chamando aos teléfonos 629879491 ou 610782630.
O prezo da inscrición é de 5 euros, e inclúe o xantar en Moldes e o regreso desde Cabanelas en vehículo. O prazo remata o 19 de setembro.
