Héctor Cajaraville e Carlos Castelao son os galardoados deste ano, que terá como mantedor a Jorge Lamas
O pazo da familia Losada, en Moldes (Boborás), será este sábado de novo o marco no que se desenvolva o acto da entrega de galardóns do XXXIV Premio Antón Losada Diéguez. Os premios desta edición recaeron en Héctor Cajaraville, pola súa novela "Nova Nursia" (da editorial Xerais), e en Carlos Castelao, pola publicación "As orixes da fotografía en Galicia" (de Alvarellos).
Como todos os anos, o programa comezará ás 11,00 horas, coa celebración dunha misa na igrexa de San Mamede de Moldes, que será cantada pola Coral Polifónica Casino do Carballiño, e seguidamente está prevista a ofrenda floral na tumba de Manuel Chamoso Lamas.
O acto literario de entrega dos premios comezará ao redor das 12,00 horas, no pazo da familia Losada. O mantedor nesta nova edición dos premios será o arqueólogo Jorge Lamas Bértolo, que se referirá a unha das facetas menos coñecidas de Antón Losada, como son os seus traballos de arqueoloxía.
Ademais das autoridades que acudirán en representación das institucións organizadoras do premio, confirmou a asistencia ao acto o secretario xeral de Cultura, Anxo Lorenzo.
Ao remate e tamén previamente durante o paseo desde a igrexa de San Mamede ao pazo, actuará o grupo de gaitas Terras do Arenteiro.
A organización do Premio Antón Losada Dieguez corre a cargo dos concellos do Carballiño e Boborás, que o fan cada ano de maneira alternativa.
