A organización da Feira do Viño do Ribeiro, formada polo Consello Regulador da Denominación de Orixe e o Concello de Ribadavia, convoca o concurso de carteis para seleccionar o que vai representar a 57ª edición, que se celebrará do 1 ao 3 do próximo mes de maio. A proposta que resulte elexida por un xurado profesional e gañadora do concurso será premiada con 1.000 euros.
A Feira do Viño do Ribeiro busca un cartel que faga alusión á Denominación Ribeiro e o seu "MovimientoRibeiro", termo que alude "á renovación, ao rexurdir e á reinterpretación da Denominación de Orixe máis antiga de Galicia, tendo en conta que é unha D.O. con viños de calidade, de paisaxe e territorio", segundo apuntan os organizadores.
No concurso poderán participar profesionais de calquera nacionalidade, podendo presentar cada un deles unha única obra que terá que ser inédita.
A data de recepción dos proxectos estenderase ata o 31 de xaneiro de 2020. A selección do gañador do concurso farase na semana do 3 ao 7 de febreiro cun xurado experto, formado por profesionais do deseño e artes, momento no que se fará pública a imaxe e o seu creador.
Os traballos poderán realizarse con calquera técnica pictórica, informática ou fotográfica, entre outras. Os carteis seleccionados para a quenda final serán expostos posteriormente en Ribadavia, no local social da Madalena, entre os días 27 de abril e 3 de maio de 2020.
As obras físicas non premiadas poderán ser retiradas a partir da clausura da referida exposición na sede do Consello Regulador nun prazo de 30 días, segundo figura nas bases do concurso.
