O escritor Frutos Fernández González presentou o seu último libro, resultado de 20 anos de traballo de investigación, sobre a “Historia de San Clodio”. Co aforo da igrexa desta parroquia de Leiro case completo de asistentes arropando ao autor, transcurriu o acto no que se falou da evolución desta localidade desde o S.X ata o XX, incidindo nos contidos máis relevantes recollidos no libro e tamén nos seus principais persoeiros.
“Resulta moi emocionante presentar este libro na igrexa onde me bauticei e onde celebramos actos importantes”, sinalaba Frutos Fernández, referíndose aos seus vínculos con San Clodio, un lugar cuxa historia está ligada a igrexa e ao mosteiro. Apuntou tamén o autor que “a historia é un relato construído sobre un contexto de feitos do pasado”, e que se o Padre Eiján “convertiu o pasado do Ribeiro en historia, hoxe é este libro o que converte o pasado de San Clodio en historia”.
Frutos Fernández falou sobre a falta de historia local, sobre a que “pode resultar incluso máis difícil escribir”, referíndose aos moitos anos de investigación nos arquivos. “Estou satisfeito especialmente polo que aprendín e disfrutei descubrindo enigmas da historia local”, engadía, asegurando que xeráronlle “momentos de grande satisfacción”, e apuntaba varios exemplos, entre eles o descoñecemento xeral de que o Mosteiro de San Clodio perteneceu ao Cister antes que ós Benedictinos. Entre outros contidos incidiu na importancia que tiveron as escolas, gracias ás que o número de estudantes chegou a superar incluso ao de Ourense.
O escritor aseguraba que “a verdade é o obxectivo principal deste libro” e que non tivo subvención de ningún tipo, porque “non son amigo da cultura subvencionada”. Aínda que é un libro “fundamentalmente de historia, tamén reserva espazo para a memoria, as emocións e os sentimentos”, manifestaba.
No acto interviu Francisco Sandoval Verea, historiador e arquivista, quen destacaba os libros, publicacións en revistas especializadas e artigos de prensa de Frutos Fernández, e sinalaba que “a hisotoria local é unha importante aportación a historia xeral, é unha contestación a preguntas da historia xeral”, subliñando que o autor “captou a partir da tradición oral ou a súa experiencia directa cuestións que se perderían”.
O párroco de Nosa Señora de Fátima en Ourense, Celso Rodríguez, asegurou que o seu amigo soupo descubrir “as orixes gloriosas e os valores auténticos da historia de San Clodio”, sinalando que é un ”legado rico en historia, cultura e relixiodidade”. No acto participou Lucila Ventoso, directora de Andavira Editora, e contouse coa actuación musical de Frank Díaz.
