De agasallo polo Día das Letras, un libro en galego

Ata 1.200 nenos do colexio Salesianos se adiantaron onte ao Día das Letras Galegas en homenaxe a Fernández del Riego, cun acto no que repartiron marcapáxinas conmemorativos, se portou a bandeira galega e se repetiu en voz alta: “Mil primaveras máis para o galego!”. Foi só un dos festexos adiantados que, especialmente os máis cativos, celebraron por toda a provincia. Agasallar libros está de moda para fomentar o galego na provincia: foi a principal actividade promovida polos concellos. Na cidade, os rapaces do CEIP Virxe de Covadonga adiantáronse con música de gaita, a cargo de Alexander Suárez, e de pandeireta, a cargo de Uxía Seoane. Por outra banda, a Sociedade Filatélica Miño inaugurou unha exposición sobre as Letras Galegas. No oriente ourensán, os alumnos de Primaria do colexio público Otero Pedrayo, de Viloira, desenvolveron un espectáculo na praza, no que bailaron unha muiñeira e un par de temas das Tanxugueiras, antes de rematar cantando e tocando o himno galego. Ademais, fixeron lectura das coplas dos Maios e lembraron a figura de Francisco Fernández del Riego nun pódcast. O alumnado da ESO do Lauro Olmo de O Barco participou nunha xornada de animación á lectura e investigación nas rúas da vila. Resolveron enigmas polo Casco Urbano mentres fomentaron o galego. No Concello de Rubiá houbo premio. Agasallaron aos alumnos do colexio plurilingüe Virxe do Camiño cun libro para conmemorar o Día das Letras Galegas. Aínda que onde se esgotaron os libros foi na Praza de Abastos de O Barco: en menos dunha hora xa non había ningunha das novelas que deixou a Concellería de Educación, xunto ao Centro Comercial Aberto O Barco, para espallar o galego entre a veciñanza. Tamén son de agasallar libros no Concello de Oímbra, que puxo publicacións a disposición dos veciños de maneira gratuíta, con motivo do Día das Letras Galegas. A Mezquita tamén se adiantou ao Día das Letras Galegas cun obradoiro creativo para os máis pequenos: con técnicas de caligrafía. Posteriormente, levouse a cabo a xa tradicional “Noite das Letras”, na que houbo foliada e concerto. No Carballiño apostaron por un mural: na rúa Carreira locen a partir de agora as verbas de Francisco Fernández del Riego. Xinzo deu a coñecer os gañadores dos Premios Carlos Casares. Un relato sobre as bondades de vivir no rural foi o gran triunfador. Verín apostou pola música, cun concerto do grupo Ialma na praza da Mercé. Luar Na Lubre abriu boca en Trives, cun concerto memorable. Aínda que lles fixeron competencia no CEIP Manuel Bermúdez, tamén en Trives, coa actuación das Macizas Centrais.