"E imos contrastar a nosa proposta coa de Fomento; iso vai formar parte da reunión", advertiu.
O presidente da Xunta, Alberto Núñez Feijóo, rexeita, á espera da reunión que terá lugar en xaneiro, impoñer ao Ministerio de Fomento unha data tope para a chegada do AVE a Galicia e declárase "tranquilo", pero tamén anticipa que a Consellería de Infraestruturas analiza a información para articular unha proposta que "contrastará" coa que, chegado o momento, o Ministerio poña sobre a mesa.
Nunha entrevista, preguntado expresamente acerca de se Galicia esixirá unha data concreta a Fomento, tras darse por feito que a alta velocidade non chegará finalmente en 2018, respondeu que a Xunta está a analizar a documentación facilitada polo Goberno e sabe cáles son os cinco tramos con dificultades, "dos que catro están desbloqueados e hai un sobre o que se está a falar e discutindo".
Engadiu que o departamento da Xunta encargado de xestionar as infraestruturas está tamén loxicamente analizando "as posibles solucións para gañar tempo perdido" no AVE. "E imos contrastar a nosa proposta coa de Fomento; iso vai formar parte da reunión", advertiu.
En todo caso, rexeitou falar de "datas tope". Solo avanza que hai que ser "prudente", dado que se "perdeu un ano" co Goberno en funcións, pero tamén ambicioso. "É verdade que perdemos un ano, pero a ver qué posibilidades temos para recuperar parcialmente o que perdemos", reflexionou.
Iso si, está convencido de que o AVE a Galicia é "unha cuestión irreversible" e atópase "tranquilo" porque "o primeiro valedor" da alta velocidade é "o presidente de España", Mariano Rajoy. Por iso, aínda consciente de que necesita precisar os galegos "o semestre concreto da entrada do AVE en Ourense", négase a "alarmar". Aínda que si lle preocupa "a incógnita" dos Presupostos Xerais do Estado.
"Sen presuposto de 2017, a execución, o impulso e o ritmo de finalización do AVE segue estando en interrogante", avisou, antes de reafirmarse en que espera, en xaneiro, poder trasladar aos galegos o que lle diga o Goberno central e "poder facer unha valoración como presidente".
