Marco Carballal, o candidato popular máis novo de Ourense nas eleccións municipais

Con 23 anos, Marco Carballal decidiu apostar polo seu concello natal e encabezar a lista do PP á alcaldía de Montederramo. Este 28M, é o candidato popular máis novo de toda a provincia, un reto que vive con ilusión: “As persoas de todas as idades somos fundamentais na política”. Aínda que estes son días de moita actividade, de mitins e reunións diarias coa veciñanza, Carballal recoñece a alegría de estar ao fronte do proxecto popular. “Eu amo Montederramo”, recalca. Por que decidiu sumarse á vida política do seu concello? O actual alcalde, Antonio Rodríguez, decidiu deixar o seu posto e non volver a presentarse, así que xurdiu a posibilidade de que fora eu o que o substituíra como cabeza de lista. Foi o amor a este concello o que me animou a dar o paso. Tiña xa experiencia neste ámbito? Nunca estiven vencellado á política deste xeito, é certo que xa formaba parte da lista do PP nas eleccións municipais de 2019 (era o número sete), pero non estiven na corporación. Interesáballe a política? Non estaba tan interesado, a verdade. Pero si é certo que dende hai anos organizaba actividades no concello para promocionar Montederramo e para promover a vida social e cultural dos veciños. Nese sentido si que estaba involucrado co meu municipio, e agora teño a oportunidade de facelo dende dentro. Sempre traballou por Montederramo? Eu amo o meu concello dende sempre, dende que nacín. Somos a porta de entrada da Ribeira Sacra, está o mosteiro, a gastronomía, a cultura, a paisaxe… Cre que é necesaria a visión da poboación máis nova? Si, claro, é moi necesaria, pero se chego á alcaldía non só vou tirar polos novos. No noso concello tamén é moi necesario mirar pola xente maior, pensar neles e en cales son as súas necesidades. Se goberno gobernarei para todos, tanto para o que acaba de nacer como para os veciños de máis idade. Como reaccionan os veciños cando descobren que con 23 anos é candidato a alcalde? Quizais lles chame a atención que sexa tan novo, pode ser, pero saben que son un rapaz que sempre estivo implicado nas actividades, na vida deste concello, en promover todo o que temos aquí. Ademais, creo que os veciños tamén teñen certas ganas dun cambio, de que cheguen ideas novas, novos proxectos, e penso que ven a miña ilusión e o meu interese en acadar o benestar de toda a poboación. Que espera que suceda o domingo? Eu espero lograr a alcaldía, a verdade. Confío en que os veciños crean neste proxecto que presentamos, que busca mellorar as súas vidas e seguir apostando polo noso concello. O equipo popular é o que máis cousas fixo polo municipio.