A Aula da Natureza do Río Miño desenvolveu sesións formativas de observación astronómica do ceo ourensán
A astronomía defínese como a ciencia que estudia os corpos celestes, os seus movementos, os fenómenos ligados a eles ou a investigación da súa orixe. Aínda que o espazo e as estrelas continúan tendo moitísimas preguntas sen resolver, observalo axúdanos a tomar conciencia do noso lugar no firmamento e a comprender algunhas das leis que rexen as nosas vidas.
Eses interrogantes son hoxe menos para os alumnos da cidade de Ourense gracias ó obradoiro de astronomía desenvolvido dende a Aula da Natureza do Río Miño en Oira en colaboración coa Asociación Astronómica de Ourense. Foron moitos os centros educativos que se achegaron ata esta zona para contemplar os segredos do ceo e as estrelas a través dun telescopio, como é o caso do colexio Amadeo Rodríguez Barroso, que participou en dúas das sesións.
Da man de José Antonio Álvarez, presidente do colectivo astronómico ourensán, os escolares fóronse achegando ata o telescopio. Aínda que era de día, gracias a uns filtros específicos, puideron contemplar directamente o sol, ver os gases que o rodean e a natureza da súa luz. Moitos mesmo se animaron a mirar varias veces.
