Imprimir

Ridimoas porá de novo en uso dous muíños de orixe medieval

La Región | 10 de septiembre de 2018

Traballos de recuperación da canle de auga nos muíños de Ridimoas.
Traballos de recuperación da canle de auga nos muíños de Ridimoas.

A asamblea de socios decidirá na asemblea xeral de 2019 sobre a súa posta en funcionamento

Un grupo de voluntarios da asociación naturalista Ridimoas, baixo a coordinación dun escultor, iniciou a restauración dos dous muíños situados no regato de Caldelas, dentro dunha parcela que mercou a entidade para incorporala ó bosque que xestiona en Beade. As tarefas comezaron coa limpeza da canle de entrada de auga ás instalacións, que se atopaba tupida debido ó arrastre das choivas do inverno, e a reposición e montaxe das pedras de soporte da cabeceira, que se fixo utilizando un sistema artesán de poleas debido ó seu elevado peso.

Estes muíños, tal e como apunta o presidente de Ridimoas, Pablo Rodríguez, "teñen a súa orixe na Idade Media e pertenceron á Encomenda de Beade da orde do Temple, e con posterioridade pasaron a mans privadas e aínda estiveron operativos ata o ano 1981, que foron abandoados tra-lo pasamento da súa propietaria". No interior das edificacións, nas que o muiñeiro dispuña dunha vivenda con lareira, pódese comprobar que as moas estaban adicadas inicialmente a moer trigo e centeo, para logo incorporar unha nova para o millo, coincidindo coa introdución desta planta en Galicia, segundo comenta o responsable da asociación.

As obras de rehabilitación continuarán co reforzamento de dúas paredes da zona de vivenda para facilitar o asentamento e recuperación do tellado, que apareceu fundido. Pablo Rodríguez adianta que, "na vindeira asamblea xeral de marzo, consultaremos cos socios a posibilidade de poñer os muíños en funcionamento, e, en caso afirmativo, solicitar os permisos pertinentes á Confederación Hidrográfica". As edificacións atópanse nun terreo de 6.000 metros cadrados, na parte baixa do bosque de Ridimoas, no que pretenden conservar especies de flora e fauna asociadas a este hábitat fluvial, como son o acereiro, a cerdeira de acios, a xabroneira, o merlo acuático, o martiño peixeiro, a garduña, a algaria ou as libélulas.

Puede ver este artículo en la siguitente dirección /articulo/o-ribeiro/ridimoas-pora-novo-uso-dous-muinos-orixe-medieval/20180910091010822083.html


© 2019 La Región

© La Región S.A.

Contenidos con licencia Creative Commons