Hai uns días varias organizacións non gobernamentais, Amnistía Interrnacional, Greenpeace, Interpón Oxfam e Fundació per a Pau, denunciaban que o goberno español segue vendendo armas a países nos que se violan os Dereitos Humanos como Paquistán, Marrocos, Colombia ou Israel. Reclamaban do goberno que aplicase de xeito correcto a Lei do Control do Comercio de armas e material de dobre uso aprobada no 2007 e que evitase contribuír a esas violacións dos Dereitos Humanos facilitando armas a tales países. O tema é complexo. Vemos a Zapatero a cotío dando consellos éticos sobre os males do mundo e os seus posibles remedios. Iso sae en grandes titulares, pero as notas das ONGs quedan, agás excepcións, nas marxes da páxina. A razón é evidente: tal negocio de armamento move máis de 900 millóns de euros. En tempo de crise, ademais.
