O Concello de Baños de Molgas ampliará nas vindeiras semanas o seu cadro de traballadores coa incorporación de profesionais para servizos múltiples e medioambiente.
A propia Administración Local e o Boletín Oficial da Provincia anunciaron este luns a apertura do proceso que, dende hoxe, e durante catro días hábiles máis, permanecerá aberto para que as persoas interesadas poidan presentar as súas solicitudes.
No caso dos dous postos ofertados para peóns de servizos múltiples, o contrato laboral estenderase durante oito meses a xornada completa.
Por outra banda, no caso dos traballadores no eido medioambiental, o periodo de traballo reducirase ata os cinco meses, sendo a xornada completa do mesmo xeito. En ambos casos, o sistema de selección será por concurso-oposición.
As bases da convocatoria, segundo informaron dende o Concello de Baños de Molgas, poderán consultarse na páxina web do Consistorio ou no propio taboleiro de anuncios. Ademais, para solicitar máis información, os aspirantes poderán dirixirse ás oficinas municipais en horario de 09,00 horas, a 14,00 horas. Será necesario solicitar cita previa para presentar a documentación.
