O Padroado da Fundación Curros Enríquez, reuniuse na mañá de hoxe, 26 de xuño de 2021, na Horta da Palabra da Casa dos Poetas coa presenza, entre outros membros a título persoal como Xosé Luís Axeitos, Xosé Benito Reza, Felipe Ferreiro Feijoo, José María Paz Gago e outros, así como representantes da Deputación Provincial de Ourense, da Real Academia Galega, da Universidade de Vigo, da Universidade da Coruña e do Concello de Celanova para outorgar o XXXVII Premio “Celanova, Casa dos Poetas”. Este foi para a comunidade da Residencia de Maiores 'San Carlos' de Celanova.
"Concederlle o XXXVII Premio “Celanova, Casa dos Poetas” á comunidade da Residencia de Maiores “San Carlos” de Celanova, entendendo como tal ó conxunto de traballadoras e colectivo de maiores residentes, pola fortaleza no traballo, a capacidade de organización e resistencia, así como pola valentía e profesionalidade coa que se enfrontaron á virulenta entrada da covid-19 na comunidade, naqueles primeiros momentos do confinamento no mes de marzo de 2020, cando, tanto os resultados inmediatos que se maliciaban como as posibles consecuencias, agoiraban tempos certamente tráxicos para a vida das persoas", sinala o fallo.
Conscientes da dimensión que tomou a pandemia neses primeiros momentos (foi a primeira residencia de maiores afectada en toda Galicia) provocando o falecemento directo de nove persoas residentes en moi poucos días e afectando finalmente a todo o conxunto de traballadoras no contaxio da enfermidade, non só continuaron traballando, senón que foron quen de amosar unha imaxe de dignidade fronte a extrema dificultade, certamente admirable.
A Fundación Curros Enríquez, lonxe de pretender que este recoñecemento tan sentido poida ser considerado un premio localista, desexa deixar patente que é obxectivo final do mesmo é o de simbolizar nesta comunidade a tódalas residencias de maiores de Galicia, que atenden cada día ó mellor da sociedade, que son as persoas maiores, así coma a tódolos colectivos que dende aqueles días acedos de marzo se teñen enfrontado e seguen enfrontándose en primeira liña as distintas fases nas que nos temos visto mergullados como sociedade, no epicentro do máis grande envite vital que nos ten sido presentado á humanidade durante o último século."
O premio entregarase o primeiro domingo do mes de setembro.
