O grupo norteamericano The Offspring ofrecerá o concerto máis destacado do festival Rock 'in Way' Estrella Galicia de Compostela, que incluirá as actuacións de máis de vinte bandas no Monte do Gozo de Santiago de Compostela.
O festival, que se celebrará nos días 9 e 10 de setembro, foi presentado hoxe polo conselleiro de Cultura e Turismo, Roberto Varela, quen dixo que 'permitirá que as bandas galegas cun enorme futuro compartan cartel con artistas consagrados, dándolles así proxección e visibilidade ao seu traballo'.
Entre os grupos participantes están os norteamericanos 'The Offspring', os británicos 'Toy Dolls' e os franceses 'Rinôçerônse'.
Varela destacou que o Rock 'in Way' está pensado para ser 'unha gran festa popular' que repasará os últimos 30 anos da música rock, pop, punk e indie do mundo.
No festival tamén actuará o grupo arxentino 'Las pelotas' e os españois 'Delorean', 'Söber', 'Tote King' ou 'Muchachito Bombo Infierno'.
A estes grupos sumaranse os galegos de 'Triángulo de Amor Bizarro', 'The Blows' e 'Niño y Pistola', xunto a 'proxectos prometedores' como 'Dirty Sock' e 'Igloo'.
O festival celebrarase no Monte do Gozo, 'un dos puntos neurálxicos do camiño de Santiago', segundo Varela, que recibirá vinte grupos diferentes, en dous escenarios, ademais dunha atractiva 'oferta complementaria de actividades lúdicas'.
Varela tamén indicou que os peregrinos terán un desconto en 10% nas entradas, que se poderán comprar na tenda Reixa de Compostela; e que tamén terán rebaixas en aloxamento e unha zona de acampada gratuíta.
As entradas estarán á venda a partir do día 28 de xuño, e os primeiros 5.000 abonos para os dous días terán un custo de 29 euros máis gastos de xestión.
