O Entroido está en todos os recunchos da cidade e da provincia estes días. Onte, foi unha xornada máis de festa en dúas zonas da cidade con moita tradición entroideira, como A Ponte e a vila de Seixalbo. Os primeiros tiveron, como é habitual, un domingo dedicado aos nenos, con xogos infantís pola mañá. Logo houbo unha paparota con pulpo, carne ó caldeiro e viño, e xa pola noite un concerto.
Pola súa banda, en Seixalbo tiveron ruada, sesión vermú e o tradicional xantar festivo do “Domingo gordo” do Entroido, que congregou a decenas de personas cun moi bo ambiente.
Tamén foi un día de celebración, na medida do posible, para os traballadores do CHUO. O Sergas celebrou a festa do entroido con reparto de de orellas ao persoal de garda coa colaboración das Asociación de pacientes e as máscaras das Bonitas de Sande, que fixeron unha exhibición entroideira diante do hospital.
Xa na área metropolitana, continuou a troula en Barbadás durante toda a xornada, con charangas percorrendo as distintas parroquias e en Esgos celebrouse a tradicional saída dos felos e madamas polas aldeas onde foron recibidos con vítores polos veciños. Xa pola tarde, celebraron un desfile de disfraces.
A provincia é un non parar. E aínda queda festa. En moitos sitios, o mellor está por chegar.
