O lema turístico 'Spain is different', que tan eficaz resultou nos anos 60 para atraer ao turismo a España, representa xustamente a estratexia promocional contraria, baseada no ‘moito en común’, pola que apostou a Consellería de Innovación para intentar facerse cun anaco do inmenso pastel turístico que supón Xapón, cun mercado emisor de 18 millóns de turistas ao ano, que non gustan da viaxe de aventuras --no seu estilo de vida non ten lugar á improvisación-e buscan ‘seguridade e tranquilidade’, como a que dá un destino no que un se sinta como na casa.
Consciente diso, unha delegación da Consellería de Innovación, presidida polo seu titular, Fernando Blanco, realizou durante esta semana unha intensa campaña de promoción en Tokyo, Kyoto e Wakayama co obxecto de descubriles que, ao contrario do que puidese parecer, son máis cousas que os achegan á comunidade galega que os separan.
Así, teñen en común rutas de peregrinación; forte presencia do culto relixioso, aínda que neste caso os templos e santuarios non son cristiáns, senón siontoístas e budistas, capaz de atraer 1.500 ata 50 millóns de fieis; rías coa mesma denominación que as 'Baixas'; e un importante sector e gastronomía pesqueira e marisquera.
Fronte a estas similitudes, as diferenzas con Galicia agrándanse en cuestións como a taxa de paro (3,7%); os soldos e pensións que non baixan de 1.500 euros; e un TAV dende hai máis de 40 anos, coñecido como o 'Tren Bala', a velocidade do cal a máis de 300 km/hora une os 500 quilómetros que separan Tokyo de Kyoto no mesmo tempo que un TRD enlaza Vigo con A Coruña: dúas horas e media.
En todo caso, as diferenzas están vinculadas esencialmente co seu nivel económico, o que sitúa a Galicia nun destino óptimo para o seu nivel adquisitivo e á comunidade ante un emisor desexado polo gasto posible a desembolsar en territorio galego.
Non obstante, e a pesar diso, só o 2% dos turistas que visitan Galicia son xaponeses e a maior parte vinculados ao Camiño de Santiago, que é ‘moi popular’ entre os xaponeses porque tamén contan con dúas vías de peregrinación importantes: a de Kukai, con 88 templos, e a sintoista-budista de Kumano, que transcorre por 500 quilómetros da prefectura de Wakayama, que precisamente está irmandada coa Xacobea por ser as dúas únicas rutas do mundo declaradas Patrimonio da Humanidade.
‘GANCHO’ DO CAMIÑO DE SANTIAGO.
Por estes motivos, Innovación admitiu que a promoción turística utilizou a ruta como ‘gancho’ para atraer máis visitantes do país do Sol Nacente ao resto da oferta turística coa que conta Galicia, coa finalidade de ‘triplicar’ o número actual de visitantes de aquí ata 2010.
Para iso, nesta viaxe estableceuse un acordo de colaboración coa prefectura de Wakayama que incluirá actividades en ambos os dous territorios para levar a cabo unha promoción conxunta que repercuta tamén en máis presenza de galegos entre os 20.000 fieis anuais que a percorren, fronte os máis de 110.000 do Camiño de Santiago en tan só os seis primeiros meses de 2007.
Con este mesmo obxectivo, lograron por parte da Liga de Cidades Históricas do Mundo --da que forma parte Santiago e ten a súa sede en Kyoto-o compromiso de celebrar unha convención en 2008 destas urbes na cidade de Lugo. Ademais, a antiga capita imperial acollerá unha exposición sobre o Camiño e a riqueza patrimonial e cultura de Galicia, ao tempo que será a sede dunha convención internacional de cociñeiros, á que están chamados a participar restauradores galegos.
‘IMPRESCINDIBLE’ CAMPAÑA EN JAPON.
Todas estas accións foron dirixidas a ‘obter máis presenza neste mercado emerxente para conseguir incrementar o número de turistas a Galicia’, resumiu Fernando Blanco, quen considerou, tras concluír esta campaña, que o ‘obxectivo se ‘cumpriu’, aínda que para iso viu ‘imprescindible’ realizar esta promoción 'in situ'.
Non en van, o propio ex alcalde de Kyoto e secretario da Liga de Cidades Históricas do Mundo, Hisakazu Takagi, admitiu que a reunión co conselleiro de Industria foi ‘moito máis interesante do que esperaba’, aínda que precisamente e, todo o contrario do que pretendía esta campaña das similitudes, o encontro serviu para revelar unha diferenza amable entre Galicia e Xapón.
Así, tras o encontro, este alto cargo contrapuxo a ‘proximidade, humanidade e simpatía’ que asegurou descubrir no galego Fernando Blanco fronte á ‘prepotencia’ dos políticos nipóns. ‘Vese que é moi boa persoa’, resolveu, ao tempo que admitiu, no que se converteu na anécdota da viaxe promocional, que non puidera evitar ‘collerlle moito cariño’, a pesar das escasas dúas horas de encontro.
SO CINCO DIAS DE VACACIONS.
Non obstante, gañar este aprecio dos nipóns a base da proximidade conta cun escollo importante que amplía a dificultade que supoñen, xa por se sós, os 10.000 quilómetros de distancia de 15 horas mínimo de voo: o sentido da eficiencia extrema dos xaponeses que os leva a renegar de dez dos seus quince días oficiais de vacacións por ‘solidariedade’ cos seus compañeiros, o que limita a xubilados e estudantes os que poden viaxar a destinos tan afastados.
En consecuencia, a maioría dos xaponeses coñecen Galicia, exclusivamente case polo Camiño de Santiago, pero moi poucos poden realizalo. ‘O primeiro que necesitaría para percorrelo, sería xubilarme’, admitiu o vicegobernador de Wakayama, revelando así a dificultade compartida co resto dos cidadáns nipóns polos escasos días de asueto dos que gozan.
Por iso, considerou necesario ‘máis facilidades’ de comunicación que reduzan o número de horas de voo, xa que animar a gozar dos dez días libres restantes é unha opción impensable para un pobo que estuda reducir o mes de vacacións de verán dos escolares e volver implantar clases os sábados, porque periga o liderado de Xapón na Competición Mundial de Matemáticas.
