Un incendio rexistrado nun laboratorio de análise alimentaria e ambiental da cidade de Vigo saldouse con numerosos danos materiais, segundo informaron fontes da Policía Local.
O lume rexistrouse na madrugada deste mércores nun laboratorio da rúa Zaragoza, a onde se trasladaron axentes do 092 e efectivos de bombeiros. Ao chegar, comprobaron que saía fume dun baixo dun edificio.
Os bombeiros forzaron a reixa do local e romperon o cristal da porta para acceder ao interior e poder sufocar as lapas, unha tarefa que lles levou uns 45 minutos e non estivo exenta de risco, posto que, segundo confirmou o xerente da empresa, no laboratorio se gardan produtos químicos.
Segundo unha primeira valoración dos bombeiros, o lume iniciaríase por un curtocircuíto nun regulador de tensión, propagándose despois a unha caixa de madeira próxima. Á marxe dos danos materiais, non houbo feridos nin desaloxo de persoas.
