Un grupo de investigadores galegos vinculados aos programas Parga Pondal e Ramón y Cajal acusaron hoxe a Universidade de Santiago (USC) de pór o seu futuro no aire coa súa 'proposta de estabilidade'.
Segundo denunciaron dous dos voceiros deste grupo, Ezequiel Álvarez e Pedro Vázquez, a USC propuxo ofertar cinco prazas para 32 investigadores, co que o resto quedarán sen posibilidades de levar a cabo os seus proxectos.
A proposta prevé ser votada esta tarde nunha reunión que comezou ás 17:00 horas e na que, segundo os investigadores concentrados diante do Reitorado, o resultado é incerto, xa que o Consello de Goberno da USC está 'moi dividido'.
Os primeiros en quedar no paro serán 17 investigadores do programa Parga Pondal que finalizan os seus contratos o vindeiro 28 de decembro, segundo denunciaron os voceiros.
Nunhas declaracións aos medios diante do Reitorado, onde se concentraron máis de cen persoas, ambos os dous voceiros denunciaron que o reitor da USC, Juan Casares Long, transformou 'de golpe' as súas formulacións e pretende que o Consello de Goberno os referende.
Segundo dixeron, o reitor dilatou a súa proposta 'inxustificadamente', de maneira que foi presentada onte aos decanos de facultade pero non aos investigadores -explicou- xa que ata xuño prometera que estes só tiñan que preocuparse de conseguir a súa avaliación positiva, de xeito que colocou 17 investigadores 'na súa trampa para ratos'.
Álvarez argumentou, ademais, que esta proposta incumpre o mandato do claustro do pasado 14 de novembro no que se aprobou por ampla maioría a captación e estabilización a través destes programas de investigación como liña estratéxica.
Denunciou que o próximo ano os investigadores que terminan os seus programas terán dúas opcións: 'Fuxir antes de que se peche o cepo, ou confiar en que o señor reitor, na súa magnánima potestade e novamente referendado polo 'Consello de Goberno', retire a trampa'.
En opinión dos investigadores, a USC 'perde totalmente o seu papel de liderado e referencia neste asunto', xa que era a única universidade galega que asumía un compromiso para a estabilización dos investigadores que completasen favorablemente os programas de captación de recursos humanos.
'Agora sitúase directamente no furgón de cola da capacidade investigadora no sistema universitario de Galicia', apuntou Álvarez, que cualificou a proposta do reitor de 'indigna e vergonzosa', así como dunha 'traizón' aos principios da captación de recursos humanos e sobre todo ao que, nas súas palabras é o activo máis valioso desta universidade, o capital humano.
Ademais, preguntou que vai pasar cos proxectos pendentes e coas teses de doutoramento dos seus alumnos.
Ambos os dous indicaron que intentaran asistir á reunión do Consello de Goberno da USC e entregar unha carta coas súas reivindicacións pero apuntaron que non llelo permitiron e que os botaron do edificio.
Fóra agardábanos máis dun centenar de compañeiros entre xefes de laboratorio, profesores, investigadores e persoal que non está afectado por esas decisións pero que indicaron que apoian a súas demandas.
