O voceiro parlamentario do PSdeG, Abel Losada, asegurou hoxe que o Goberno de Feijóo conta cunha 'estratexia predeterminada' para xustificar os recortes nos servizos públicos por parte do PP.
O presidente da Xunta, Alberto Núñez Feijóo, anunciou hoxe que o Goberno galego recortará 128,5 millóns de euros de gasto das súas consellarías do actual orzamento e que emitirá débeda por outros 114 para compensar o 'incumprimento' do acordo de financiamento do Goberno central.
Nunha nota de prensa, Losada insiste en que esta decisión se trata dunha estratexia 'predeterminada', que tamén 'pertence ao itinerario da confrontación co Goberno de Zapatero'.
O deputado socialista cualifica de 'irresponsabilidade maiúscula' a inclusión pola Xunta nos orzamentos de partidas ás que, ao seu xuízo, non tiña dereito. Ademais, insistiu en que o 'teatro montado por Feijóo é unha auténtica estratexia mediática'.
Igualmente, Abel Losada subliña que a política económica do presidente da Xunta é contraditoria porque, 'dun lado, inclúe unha política discursiva na que hai unha baixada retórica de impostos e, por outro, mantén unha folga de brazos caídos na loita contra a fraude fiscal'.
