O alcalde de Ferrol, José Manuel Rey Varela, recordou hoxe que o ano pasado foi 'moi duro' para o sector naval na bisbarra de Ferrolterra e expuxo que espera de 2014 'unha situación diferente'.
'Todo Ferrol está a mirar cara a México e cara a Madrid', manifestou o tamén presidente da Federación Galega de Municipios e Provincias (Fegamp), José Manuel Rey Varela, tras a sinatura dun convenio de colaboración coa Xunta para aumentar a formación dixital pública.
Rey Varela realizou este pronunciamento tras insistir de forma reiterada, ao igual que outros dirixentes populares galegos como o propio presidente da Xunta, Alberto Núñez Feijóo, en que a dirección de Navantia ten a obriga de conseguir pedidos para o estaleiro.
En canto a México, a subsidiaria da petroleira Pemex, Pemex Exploración e Produción (PEP), fixou o próximo 28 de xaneiro ás 17.00 horas (hora mexicana, sete horas máis en Galicia), como nova data para dar a coñecer a resolución do concurso internacional para a construción de dous floteis, no que concorren os estaleiros galegos Hijos de J.Barreras e Navantia-Ferrol.
A filial de Pemex fixou esta nova data o pasado mes de decembro tras un novo aprazamento da adxudicación. Rey Varela ratificou este mércores que polo momento non hai novidades ao respecto.
