O candidato á Secretaría Xeral do PSdeG-PSOE, Valentín González Formoso, comezou outra semana de encontros coa militancia en distintos lugares de Galicia, e este luns fíxoo no Carballiño, onde apelou ao orgullo do socialismo e instou a “recuperar a ilusión e a esperanza fronte ao compromiso e a resignación”.
Formoso manifestaba que “somos o PSdeG, a nosa aspiración non pode ser gañarlle ao BNG e ser segunda ou terceira forza, senón gañarlle ao PP e gobernar”, afirmou.
O candidato á Secretaría Xeral do PSdeG-PSOE sinalou o 30 de outubro como unha data chave xa que “ese día decidiremos se queremos quedarnos como estamos ou se queremos un cambio, un novo pulo para que o socialismo galego avance” e defendeu o proceso de primarias “ao que non lle hai que ter medo porque están no ADN democrático do PSOE e dan voz á militancia para que decida o modelo de partido que quere” fronte aos “dedazos doutros partidos”.
“Non debemos esquecernos de que todos somos compañeiros, todos somos socialistas”, engadía.
Valentín González Formoso insistiu no Carballiño en “confrontar ideas e proxectos, non persoas, para facer un PSdeG máis forte e unido no que todas e todos sumamos e aportamos, que estea ao carón da xente e, como xa fixo no pasado, volva a ter criterio sobre asuntos de país”.
Nese sentido, fixo un chamamento a recuperar a ilusión e a esperanza ante a próxima celebración das eleccións primarias dentro do partido.
