O Concello organiza programas de formación gratuitos a través das asociacións de veciños do rural
Os veciños do rural de Carballiño demandan formación en novas tecnoloxías para poder utilizar o centro municipal de informática, sobre todo co fin de contactar cos familiares que teñen fora. Así o transmitiron varias asociacións veciñais á Concellería de Medio Rural, que decidiu poñer en marcha cursos de formación totalmente gratuitos e canalizados a través das directivas das entidades veciñais.
As sesións desenvolveranse no centro municipal de informática (Cemit), que na actualidade xa ten rexistrados un total de 495 usuarios. Algúns fan un uso diario desta aula, instalada no terceiro andar da Casa Consistorial, pero a maioría utilizan os ordenadores de vez en cando, para facer algunha consulta ou para cuestións moi concretas como establecer contacto coas súas familias.
Non hai un perfil definido entre os usuarios, pero cada vez acude máis xente maior para aprender a usar os ordenadores, segundo puntualizan os responsables municipais. "Probablemente, inflúa nesta cuestión a necesidade de ocupar o tempo libre ou comunicarse a través de internet cos seus familiares no extranxeiro", matizan, tendo en conta a demanda que parte agora dos pobos do rural.
Entre os usuarios, tamén hai moitos inmigrantes e incluso doutros lugares da comarca. Dende a súa posta en marcha, en maio do ano 2011, neste centro se impartiron 192 cursos, nos que se inscribiron 797 persoas. En total, o número de horas dedicadas a formación ascende a 8.764, segundo confirma o responsable do departamento de informática do concello e do Cemit, Christian López.
Precisamente, o pasado venres concluiu un curso de iniciación á informática, ao que asistiron 20 persoas. E onte comezou outro sobre páxinas e grupos de facebook, que tamén ocupou todas as prazas dispoñibles. Este último, de grado medio, ten unha duración total de 4 horas e media.
