“Actuando nas marxes” é o lema que guiará o discurso e a liña de coherencia da Mostra Internacional de Teatro de Ribadavia (MIT) deste ano, que terá lugar do 15 ao 24 de xullo.
“Territorios nas marxes, eses espazos artísticos, sociais, xeográficos e políticos que nos estimulan, que nos cuestionan, que nos convidan a ver a complexidade da realidade sen caer en discursos simplistas. Aquí queremos asentar a liña conceptual desta MIT 2022. O marxinal, o marxinalizado, a marxinación, a marxinalidade…”, sinalan os organizadores da mostra.
“É un tema estimulante, un concepto aberto, na liña da creación contemporánea e do seu carácter liminal, como quere ser este festival que sempre aposta por descubir e explorar novas fronteiras e o modo de cuestionalas”, engaden os responsables da mostra.
O deseño, de A&B, gabinete creativo de Ribadavia que xa forma parte do equipo habitual de traballadoras da MIT, combina formas xeométricas e coloridas con fotografía dos corpos en escena de edicións anteriores, corpos fotografiados por Rosiña Rojo. O cartel inspírase na corrente artística do Grupo Memphis, que xurdiu en Italia nos anos oitenta para revolucionar o concepto de deseño e arquitectura.
