O Concello de Arnoia convoca o concurso de carteis para a difusión do evento e da historia e cultura deste municipio
O Concello de Arnoia confirma a celebración da súa XLIII Festa do Pemento, que terá lugar os días 5, 6 e 7 do próximo mes de agosto no seu formato orixinal de antes da pandemia.
Agora, por ese motivo, convoca unha nova edición do seu Concurso de Carteis, iniciando así a conta atrás para atopar o gañador do cartel que ten un mes de prazo para dar forma e imaxe a esta festa de interese turístico galego. Exactamente ata o próximo 20 de maio.
O concurso terá un único gañador que obterá un premio en metálico de 1.200 euros.
Está dirixido a deseñadores, artistas e creadores que residan en España, axustándose ás bases que estarán penduradas na páxina web da festa. Só se poderá presentar un deseño por participante.
O obxectivo deste certame é fomentar a creatividade e dar a coñecer a festa e a diversidade da riqueza histórica, cultural, etnográfica e paisaxística do Concello de Arnoia, así como espallar e promover a arte. Na edición pasada, o deseñador murciano Rubén Lucas García foi o gañador ao representar a tradición, o sentir e a esencia da Festa do Pemento.
A Festa do Pemento despois de dúas edicións en pandemia, recuperará este ano toda a súa esencia coa tradicional degustación dos pementos cociñados de diferentes maneiras, actuacións musicais e outros espectáculos.