O Concello de Ribadavia aprobou as bases do Premio Abrente, que aumenta a súa dotación ata os 4.000 euros e sigue garantindo o apoio da edición e da escenificación das obras dramáticas gañadoras. O premio consolidouse como un dos principais símbolos de apoio constante á creación escénica en galego.
Trátase da 19ª edición e a primeira actividade que se anuncia desta Mostra Internacional de Teatro 2024, que chega aos 40 anos “con afán de retrospectiva e autoavaliación de todo o feito para impulsar o que queda por facer”, segundo apuntan os responsables municipais.
O prestixioso festival internacional de Artes Escénicas celebrarase do 19 ao 27 de xullo de 2024 e desde o Concello de Ribadavia refírense ao “informe anual do Observatorio da Cultura da Fundación Contemporánea, publicado hai uns días, no que a MIT é o único proxecto cultural destacable das provincias do interior galego -Lugo e Ourense- en 2023”.
“Este feito, lonxe de contentarnos, obríganos a pensar na febleza e precariedade do sistema cultural galego e da súa pouca relevancia a nivel estatal ou internacional. A MIT consegue manter con certa dignidade as súas accións e compromisos grazas a dous factores claros, o crecemento do público e o respaldo económico do Ministerio de Cultura”, destacando unha oferta “de primeiro nivel, nun contexto patrimonial excepcional”.
