Alfonso Blanco: "A provincia está pouco retratada no cine, vai ter efecto chamada"

Ourense verase en 108 salas de cine de toda España o próximo 9 de abril. "Cuñados", a longametraxe producida polo ourensán Alfonso Blanco–responsable de Portocabo–e rodada íntegramente na provincia, terá unha premier mundial no Teatro Principal este domingo, día 4, con acceso para o equipo do proxecto e colaboradores. Os espectadores desfrutarán dunha comedia de enredo sobre as peripecias delictivas de tres cuñados e un plan disparatado. Xosé A. Touriñán, Miguel de Lira e Federico Pérez Rey protagonizan a cinta, que conta coa subvención da Axencia Galega das Industrias Culturais (Agadic) e a colaboración da Deputación de Ourense e a D.O. Ribeiro. Alfonso Blanco, dono dunha das produtoras máis recoñecidas do país, é o ourensán detrás do proxecto, que volve á casa, onde descubriu o audiovisual co Cineclube. "É a estrea dunha película en galego máis grande da historia. É incrible e inimaxinable. A xente necesita comedia, de drama xa nos chega", adianta. Como foi o paso de facer series que están tendo un éxito tremendo como “Hierro" ou “Auga seca" e de pronto unha longametraxe? Somos de tele, pero de repente vimos que en cine e en galego non había comedia. Cando empezamos a desenvolver a idea, cumprimos dous obxectivos: a primeira comedia galega con certa repercusión e a oportunidade de rodar algo na miña casa, Ourense. O humor galego ten esa idiosincrasia propia da retranca, o maloserá… Estará presente? Si. Somos unha rexión particularmente dotada para o humor, por eso hai tantos cómicos. Temos unha maneira de ser moi retranqueira, en contra do tópico do galego oscuro, coa choiva… Nin de coña! Somos un país moi luminoso e social. A retranca é unha maneira de humor ben simpática que non hai noutro sitio. Puxemos en xogo o humor e a estrutura familiar, que as familias galegas teñen a súa coña. Ata ser cuñados é diferente en Galicia? Si. E metimos na cocteleira cousas moi galegas e algunhas particularmente ourensás. Ata as irmás da película se apelidan Ribeiro. Hai moito de Ourense. Si. Quedeime a gusto. Se algo ten a miña produtora é que as cousas teñen que ter verdade, dos personaxes, das situacións… E o sitio onde suceden as cousas importa. Os personaxes teñen que ser realistas. Como en "Hierro", tiñan que falar herreño. Traballamos conectando ben co sitio. Se "Mareas Vivas" tiña algo de alí é que parecían xente da Costa da Morte. E sendo de Ourense, traíaos finos a todos. Non se di aquí, dise eiquí. Metimos modismos da fala e un montón de cousas. Son fillas dun bodegueiro de O Ribeiro. Se compran bocatas, no Pepinillo. Para os que son da zona, hai efecto indentificador. Que lugares se recoñecerán? Bodegas Vilerma, Leiro, Allariz, polígono de San Cibrao na nave do grupo Cuevas e diferentes zonas de Ourense. Praza Maior, zona vella… Cada casa conta un pouco de como son os personaxes. Quedou a gusto elixindo sitios. Si. Ourense vese moi bonita, xa me fixeron entrevistas en revistas de viaxes. Tiñamos a vantaxe de que Ourense é unha cidade pouco retratada. O mesmo que fixemos con "Hierro", unha illa moi chula pero pouco coñecida. O efecto atracción é maior e con Ourense vai a pasar. Ourense é unha cidade moi bonita, agora que levo anos fóra, foi moi chulo facer este proxecto. Menciona “Hierro", que acaba de estrear a segunda tempara con éxito. Pódese conseguir ese efecto do papel da illa que ten na serie, que parece un personaxe máis? Xa o conseguimos un montón de veces. Con ´"Mareas Vivas" e Laxe conseguímolo. Había autobuses indo. Ou Redes en "Padre Casares". O efecto chamada haino. O de "Hierro" foi unha cousa descomunal. Levamos xa 14 países coa serie. En "Cuñados" vai depender, pero efecto terá seguro. É unha estrea ambiciosa e terá un efecto para a cidade importante. Vou devolver o meu gran de area a quen non coñeza Ourense. Que outros proxecto teñen pendentes en Portocabo? Estamos nun momento moi doce. O éxito de "Hierro" lanzounos. Tamén "Auga Seca", primeira serie en galego en HBO… Collimos a boa ola, que pasa moito na profesión, que vai por épocas. Especializámonos moito en coproducións e agora estamos con dúas. Unha é con Alemaña e outra con Inglaterra. Un dos proxectos é "Garbo", un espía español clave no éxito do desembarco de Normandía. Con Alemaña é unha serie policiaca. E anunciaremos outro proxecto no mes de outubro.